Destinado a amosar e divulgar o gran patrimonio arqueolóxico da comarca. A través de maquetas, paneis e reproducións atende ás tres manifestacións sociais da prehistoria barbanzana: megalitismo, arte rupestre e cultura castrexa. Foi construído nas inmediacións dos Castros de Neixón pola riqueza e importancia arqueolóxica destes enclaves. Está estruturado en tres plantas e conta cunha sala permanente e outra itinerante, sala de audiovisuais, tenda, laboratorio, servizo de cafetería... Rodeado dunha ampla zona verde, intégrase nunha contorna ideal para o lecer. Foi inaugurado no ano 2002 como a primeira colección aberta ao público de natureza arqueolóxica e ámbito local creada en Galicia.